由外媒報導的救市傳聞，再一次「只聞樓梯響」，二萬億的平準基金未有出現，中港股唯有繼續在低位浮沉。狼來了的大話也不過三次，外媒的不實傳聞已經第幾次了呢？不過，市場唔係完全無利好消息。
第一，雖然大行報告指出中港股連續多個月錄得資金破紀錄流出，但踏入一月以來見逾千億流入增持A股ETF，相信是傳聞中國家隊的「境外資金」為托指數入市。股票升跌有時，但如果指數跌穿某些信心位而引致長期投資者都全面投降、市場出現人踩人的擠兌，後果不堪設想。如果真係要等到『不尋常現象』出現才有所行動，一切已經太遲。
第二，中央似乎已全面放鬆購房政策，可以刺激到幾多內房成交？收入減、投資信心疲弱，就算免息免供都要諗過計過。不過人總愛八卦，或者會引到人趁長假期去睇下樓？齋睇唔買都係一種經濟活動，搭車耗油都可能會多咗。
第三，較反映沿海企業的財新製造業及服務業PMI已經連續幾個月處於擴張區。海外去庫存已持續一段長時間，任何補充庫存的行為都可能會刺激到中國在大周期通縮中出現小周期的經濟擴張。
過去半年西方國家的通脹放緩，部分是得益於中國的通縮。若隱若現的小周期擴張可能會持續一季或兩季，很難說得準，但任何周期反彈都很大機會導致原材料的需求和價格上升。這就有可能會影響西方國家的物價回溫了。
歐洲較為敏感，通脹在上個月已率先反彈，上演了一場歐洲央行放鷹，聯儲局放鴿的小劇場。到了2024年聯儲局第一次會議，卻輪到鮑威爾硬起來了。
若短期內不能夠再用通脹放緩做減息藉口怎算？去年今日發生過一次地區銀行危機，迫使聯儲局推出了個BTFP。就在鮑威爾硬起來時，紐約社區銀行股價一日內急跌四成，這一幕華爾街、聯儲局、財政部之間的宮廷戲會繼續下去。
【關於 #佛系股評人梁樹德（Scott）】
MBA, MCG, MAP, IPA, CMA(Aust), ACG, HKACG, CESGA, IRC, AHKIoD 曾擔任本地金融機構的經濟分析員及證券分析員，從研究宏觀經濟跳入股票分析；後來成為上市公司投資者關係人員，熟悉上市公司的財務及資本操作、營運和公關策略。曾／現任信報、新城財經台、明報、大公報、DBC 數碼電台、Roadshow等媒體的專欄作家及演講嘉賓。執筆專欄包括《佛系股評》、《港股淘寶》、《膏腴梁肉》、《妙輝博客》、《尋珍記》、《股壇精英》等。
