我希望多啲人會改變平日一啲習慣，而令到自己可以累積更多嘅財富。我喺呢度講嘅野，只要大家肯花少少時間做咗個框架，之後就可以好有效率咁袋返錢落袋。
其實前幾日有啲儲蓄topic 可以再仔細啲講，不過我諗大家呢兩日個關注點應該係日圓兌港元跌穿5，有無假返「鄉下」，同埋訂酒店機票多。我又何嘗唔係？又咁啱，聽日會同太太同個囡去日本。
所以諗諗下，不如講下旅行消費。其實疫情前我都算係半個旅遊達人，一年都去兩三次日本或者一次歐遊。對好多人嚟講，旅遊亦都係家庭每年一個比例幾高嘅開支，所以都想講下點樣可以俾少啲錢但又可以享受到更好性價比嘅野。
第一件事要諗嘅，係自己要唔要唱日圓。由於近年好多信用卡海外簽帳都有大百分比回贈，所以我基本上係越唱越少現鈔嘅，寧願簽卡，扣埋信用卡手續費（約2%），都有錢賺返。只不過準備簽卡既話，就要留意啲卡嘅優惠條款，好似有啲卡係500蚊以上嘅簽帳先計落回贈計劃，兼有簽帳下限；另外，大部份嘅卡都有回贈上限。
所以，最好係揀一張無下限簽帳，以及一張高回贈但有簽帳門檻嘅卡旁身，再睇實個回贈上限。簽細數一張卡；簽大額又另一張卡，夾住嚟簽。
假如你去嘅地方只收現金，又或者你無一啲海外購物會有回贈嘅信用卡，咁你嘅第一步，應該就係諗去邊度唱錢。
咁如果你諗住買定10萬、8萬港元等值嘅日圓，慢慢用，最平唱錢嘅地方，理論上喺IB，因為佢個價差唔多係接近無差價，你當時睇到網絡上個報價，就差不多係可以兌到嗰個匯價。
相反，喺銀行唱，大概會有0.3至0.6%左右差價。
但係IB都有手續費，同埋你射返啲錢落戶口會有電匯費。幾多，就要睇銀行，最後夾夾埋埋平平地都可能要百零蚊。另外，啲錢由購匯到電匯返自己銀行，同埋頭尾都可能要成個星期錢先到戶口。所以呢，你唱一萬幾千嘅話，用電匯喺銀行兌其實都Ok嘅。
要比較個價，hk.ttrate.com 到睇左先，都幾準，唯一係佢未必知果間銀行會唔會再有優惠俾您。頭盔位係記住問定你嘅客戶經理可唔可以豁免攞現鈔嘅費用。呢樣野，好多一百萬以上等級戶口都有免費額度嘅，而且我都無咩聽過今時今日仲有朋友會俾人收咗（除非你唔問）。至於找換店呢，以前曾經有去過排隊，不過近年同銀行價都分別不大，細額兌費事排隊；大額兌，我就會揀咗IB。
第二件事要諗嘅，就係住宿，近年都多咗人揀民宿，但唔好以為民宿一定係舊啲，其實而家好多都裝修得好靚，你要住到好豪華嘅一樣有得揀。
如果一家人住，除返開每個人嘅費用好多時會平過住酒店。但如果唔方便住民宿，想住溫泉酒店或者當地品牌既酒店，就應該去睇下當時幾大酒店網同有無同信用卡做緊推廣，比較咗個價先訂，訂咗之後如果發現另一個網平啲，其實係可以免費取消嘅。(特別留意返，用手機睇個價好多時會平過用桌面睇，之前消委會有批評過。）
近期日圓係咁跌，其實如果個房型無Full，喺費取消限期前取消再訂過，可能會又平咗。要再攞多啲折，去埋近期都好興果啲回贈網，㩒入去先訂，仲會有里數或者現金額外回贈。
至於如果你想住返大品牌嘅酒店，我會建議你用返果間酒店集團嘅會員計劃訂，因為酒店網既折扣碼基本上唔適用喺呢啲酒店到，你用返佢地會員計劃，可以儲積分之餘，更加好多時會有免費房間upgrade 同 extend 到checkout 時間；酒店員工又會直接同你跟進啲野，對有特別需求，好似係有BB或老人家同行，又或者需要訂餐廳服務咁，會方便好多。
另外，大家亦都可以睇返自己公司有無同呢啲大型酒店集團有合作，有無corporate rate 可以攞到，往往會有9折或以上嘅優惠。跟住以上做法，成個行程既消費，大概都可以攞返整個旅程使費既4至5%支出。如果你一年都用十萬蚊以上去旅行嘅話，肯做呢啲野，其實可以攞返四五千蚊嘅。
P.S. 有朋友表示如果揀咗俾外幣，免費取消會用左唔同匯價，好多時會蝕咗。
【關於 #何啟聰】
自小熱愛投資市場，大學時期獲得多個投資比賽獎項。因緣際會下加入投資銀行從事衍生工具銷售工作及投資者教育工作十九年，曾任職荷蘭銀行、蘇格蘭皇家銀行及瑞信香港董事。由興趣演變成事業，離開崗位後有更多空間分享理財投資看法，歡迎交流。
