同朋友傾計，呢排基本上港股有任何公司Miss Expectation，就跌10%以上；盈喜呢？無得升甚至係跌。所以呢，盈警股，真係唔好多手。您睇隻ASMPT（522）?盈喜但跌呢？好似舜宇，都只係可以走短。
美股呢？預佢業績唔好嘅，績前升左先；業績真係唔好呢？都未跌返起步位。所以如果您用基本面睇兩個市場，您睇中所有既基本面，不過呢，您係輸到暈嘅，特別係如果您炒衍生工具，次次睇中啲資訊，但市場行另一個方向，仲下下就中哂止蝕咁。
今日熱門話題係Tesla 出左季績。好多人寫左好多，我反而覺得無咩好寫，因為寫咩都唔關事，份業績睇到既，大概係：
- 車價跌
- 競爭大
- AI要揼錢搞
- 靠售後服務同儲能業務頂頂條數
如果佢唔係Tesla，咁既業績，宜家應該Trade緊20倍PE樓下，跌廿隻起碼。因為大家總係相信Elon musk 會幫公司轉型，無人駕駛、機械人，遲到但唔會唔到。而港股呢？唔信就係唔信。上次直播講左Tesla既問題，其實都準確，不過呢，真係唔好問我個價點睇，因為個價同間公司既盈利脫左鈎，而未來既夢，人人訂價不一。
所以呢，港股既問題，唔係估值高低嘅問題，係Marketing嘅問題。當然，呢度講嘅Marketing，唔係賣兩個廣告，唱好港股故事咁樣樣。點樣令人相信內地企業長期係盡力為股東睇實盤數，以及創造新價值，先係重點，先可以收窄返個市場折讓。呢樣野，無人幫到，係要企業自覺去做，停轉融通呢種行政手段，只能收短期之效。
三中全會嘅決定全文，就講到國企績效評核日後要睇增加值，即係唔係只睇產量，其實都睇到個問題所在。只不過呢，係咪做到，當然係另一回事。資金呢？仍然都係源住國家資源分配既軌跡出發。之前講三中細節，大家研究咗一輪。能源安全、軍工、公路、水利、電信。今日大部份逆市升，但係其他唔關事呢？真心弱。我諗起以前讀經濟既Crowding out effect 喺股市內蔓延。佢地會擔心自動駕駛剎唔切車，碰瓷，變真撞車。呢樣嘢同港股一樣，非常local，當地人自然會明。
【關於 #何啟聰】
自小熱愛投資市場，大學時期獲得多個投資比賽獎項。因緣際會下加入投資銀行從事衍生工具銷售工作及投資者教育工作十九年，曾任職荷蘭銀行、蘇格蘭皇家銀行及瑞信香港董事。由興趣演變成事業，離開崗位後有更多空間分享理財投資看法，歡迎交流。
