之前商湯（0020）炒上1.6元嘅時候，有網友PM我問我點睇，其實我無留意開，但睇圖個價太細價股feel，我自己好少諗呢類。又講真，咁多隻股，邊有可能隻隻睇哂。
公司日前出業績，咁啱見到又入去望下。商湯今年上半年繼續蝕錢，不過蝕少咗。問題係，17億元人民幣收入，研發都洗咗大概19億元人民幣，俾人走數嘅撥備又撥多5.8億元人民幣，仲要未計戶口仲有35億元人民幣數未收返。
大家都明，人工智能（AI）燒錢係好難停。停咗，技術落後咗，又無用，錢白燒。好似公司之前係賣傳統AI，宜家轉咗生成式AI（AIGC），傳統AI收入跌咗，但研發開支唔會俾返您。
再睇，又話好多大公司用，我唔敢質疑，但收入都係得17億元人民幣，又有人走數。每間公司，平均一個project 收到幾多錢呢？
主要問題係商湯宜家嘅收入只係接近研發開支。我唔敢質疑佢啲成品得唔得（我無睇過，我淨睇數），只係您作為股東嘅話，我覺得除咗為佢研發出錢外，似乎無咩股東價值攞到。
商湯嘅商業模型係佢研發，再提供方案俾企業，即係研發成本喺哂自己到。您唔似美國啲科企有龐大現金流應付呢個開支，而賣出去嘅產品，您吹到點勁都好，完全收唔到對等嘅收益。
美國嘅Open AI，話哂係領導者，又係自己搞模型，一樣燒錢燒到暈，今年全年可能蝕50億美元。好大機會要再集資。其實情況類似，吹到好大，但未有好實際嘅應用做到，而且，科技嘅要員走咗，間公司仲喺咪維持到個研發力？都係unknown。美國嘅open AI 無上市，咁輸嘅都係創投嘅錢，呢邊商湯呢？創投沽，而投資者就繼續入場追夢。
公司表示，截至6月30日，仲有76.265億元現金人民幣，以及11.934億元人民幣定存。每半年蝕24億至25億元人民幣嘅話，又要保留營運資金，咁您地估下隨時要點呢？
仲諗住間中炒上嘅朋友，有無諗過係間中炒落多啲？記住，我唔係質疑佢嘅模型，我唔識、唔知，但係我見到賣唔到好多錢，同時又燒緊好多錢，而市場上大把有錢賺、有派息嘅公司選擇。
