阿爺要救市，繼續有好多朋友表明話唔相信，我都明白，要大家對港股重拾信心，係要有好大勇氣，我仍然都係嗰句，港股仍然係肉眼可見嘅平，只要返回合理值，已經好唔錯。
無奈嘅係，世事總係冇一帆風順，道理係咁樣，大家都知道港股平，跌一跌之後，又會有好多人為鬧而鬧，我覺得要咁樣鬥氣真係冇乜意思。
股票賺唔賺錢係好個人嘅事，如果真心想喺股票市場上面賺錢，一定要多多聽下人地嘅經歷同意見，無論賺錢又好，輸錢又好，聽得多，大概就會明白，原來股票唔使好複雜。
要股票賺錢，一句講晒低買高賣就得，但有幾多人做到，好多人坐三年貨，結果升少少就沽咗佢。
好多人唔明白，以為坐完三年賺到錢，執返身彩就算。其實我地真係要諗一諗，坐三年又好，坐一年都好，都係有一個機會成本係到。
如果同一筆錢，拎去銀行做定存，拎去買地基股收息，唔使擔驚受怕，又可以穩穩陣陣有回報。
所以我地必須明白一個道理，股票就係風險較高嘅投資，就算地基股都係相對定存嘅風險高，呢個係投資101嘅基礎。
如果我地有一筆錢放入股票市場，就即使要面對風險，無論恒指係3萬點，定2萬點，呢個風險同樣都係遠遠大過其他投資。投資者仍然願意承受呢個風險，當然係因為潛在回報足夠抵消風險。
假如定存1年回報有4%，3年定存回報起碼有12%，如果投資股票三年之後，只係賺一成左右，其實係反映緊，投資策略有嚴重問題。
當風險與回報唔成正比，長久下去，只會越投資得耐，越輸得多。
無奈今時今日，港股一日上落千幾兩千點，風險係好難控制，所以只能夠一再提醒大家，控制好自己注碼分配，唔好太過情緒化，唔好All In All Out。
港股係難玩，但都係嗰句，我覺得今次國家係認真對待資本市場，呢個係一個重要轉變，千祈唔好自亂陣腳。
【關於 #紅磡索螺絲】
80後財務自由全職炒家，於2003年入讀大學時，已經接觸投資，2008年毅然決定成為全職投資者。2019年參加輪神比賽取得冠軍，而開始獲大眾認識，陸續獲各大平台邀請分享投資心得。
