睇燈睇路識起身

我唔希望成為人哋粒花生🥜，我只希望食人哋粒花生。

自己今年真係叫做好運氣，遇到deepseeks 好感激，真正感受憑運氣贏錢。最近做節目，自己覺得好難做，因為太多觀眾朋友問港股依家仲買唔買，其實自己覺得以價值投資角度已經過咗，或者我能力有限。

依家買都係一啲叫動能交易，趨勢交易。自己都係非常睇好港股，但係呢個位你問我做價值投資，我會覺得會唔會太遲，注碼同低位時候完全不能一樣。

喺我有限能力內，我俾唔到大家一些而家呢個位慢慢坐而享受幾倍升幅的價值投資港股。所以我嚟緊所有嘅分享，都係一啲短線操作，我反而覺得波動性上升，短炒渦輪牛熊，係一個極好機會。

自己係一個睇燈睇路識起身嘅人，就算自己覺得自己今年運氣非常之好，自己都唔會將運氣用盡，以前玩牌，贏到好勁時候會起身讓第二啲人玩吓，自己從來唔會係啲一鋪贏晒嘅人，慢慢長做長有。

作為財經KOL，其實我都唔知我嘅生意模式係點樣，有時變來變去，最近我睇Facebook後台數據，同埋邀請我做節目的公司，加上街到同PM我的索家軍，我完全明白我應該都幾唔錯，喺KOL角度應該係幾好幾紅。

因為自己都唔知自己商業模式係乜嘢，同埋自己真係容易滿足，所以呢個時候我反而係退一步，冇利用過機會再去谷紅自己，例如twins首歌，人氣不過肥皂泡，我係一個好實在嘅人，我而家望住我今年嘅回報，我10分心滿意足甚至個回報出年完全唔投資都夠，兩個月跑咗兩年嘅回報。

衰啲講句，作為香港人，同流住香港人精神嘅我，睇人PK最開心。