最近大家見我成個有禮貌KOL，完全唔搶口，加上復出跑山都知我乜事，短炒真係風雨飄渺，經歷咗一次嚴重失利，炒納指真係輸到差唔多爆廠，真係遇到炒股最怕的爆倉。但幸運嘅係，我嘅投資組合仲有「地基股」呢個支柱，慢慢為我提供現金流回血，提醒返我，錯唔緊要，最緊要係俾自己有錯嘅空間。
呢次失利，可以講係我典型嘅性格陷阱，沽納指呢個動作其實冇問題，問題係我自己心雄，將風險過份放大，忘記咗提防市場高位嘅波動性。結果就係贏谷輸縮變咗贏少輸大。
如果冇地基投資法嘅框架限制自己，我可能會更慘，所以我成日都提朋友，投資之前定好一套規模俾自己，唔好諗住邊炒邊轉，因為炒到咁上下，通常都係亂咁黎，呢個係人嘅天性，有做開短炒嘅朋友一定明我講乜。
