之前商湯（0020）炒上1.6元嘅時候，有網友PM我問我點睇，其實我無留意開，但睇圖個價太細價股feel，我自己好少諗呢類。又講真，咁多隻股，邊有可能隻隻睇哂。
公司日前出業績，咁啱見到又入去望下。商湯今年上半年繼續蝕錢，不過蝕少咗。問題係，17億元人民幣收入，研發都洗咗大概19億元人民幣，俾人走數嘅撥備又撥多5.8億元人民幣，仲要未計戶口仲有35億元人民幣數未收返。
大家都明，人工智能（AI）燒錢係好難停。停咗，技術落後咗，又無用，錢白燒。好似公司之前係賣傳統AI，宜家轉咗生成式AI（AIGC），傳統AI收入跌咗，但研發開支唔會俾返您。
