市場小姐：港股呢幾日氣氛好轉咗啊，你有冇多少收獲呀？
佛系男：還好啦，我採取微進取的策略，賺唔到最盡，但都不過不失。
市場小姐：咩叫微進取？好似網上貼文話齋，信就信，唔信就唔信，乜嘢叫微信呢？
佛系男：事關我同一時間持有幾隻保守性很高的港股，又持有Beta很高的槓桿中資科技指數和現金王阿里巴巴。
市場小姐：仍然係阿里巴巴？馬雲唔係被習大大打壓到體無完膚咩？
佛系男：係呀，仲係阿里巴巴。其實去年底以來，馬雲在內地出現的曝光次數急增，阿里巴巴自己又多搞作，馬雲已經被放生。
市場小姐：佢得罪習大大，方丈好小氣架WOR，有咁易放生佢？
佛系男：係，一啲都唔易。但現在國家經濟危急呀。高官下訪後發現原來中國經濟已經一潭死水。無選擇下就要向現實低頭啦。
市場小姐：中國經濟差，放水唔得咩？關馬雲咩事？
佛系男：上半年政府放咗水啦，M2增長保持雙位數，但國內投資低迷、物價停滯，青年失業率升至四成以上，這一切都與水多水少無關，完全係信心問題。你試想下，四年平台經濟、內房、教育多個行業被打壓，然後三年封城，再加上國家主席終身制，政府硬推國進民退，仲有咩人敢投資呀？回看歷史，打壓潮的觸發點是馬雲衰多口後發生。正所謂「喺邊度跌低，要喺邊度企番起身」。民企投資信心消失係由打壓馬雲起，如是者，要提振民企信心，咁放生馬雲就事半功倍啦。得罪方丈個都重新有運行，更何況其他人呢？只要內地班民企老闆有呢個想法，咁信心就會恢復喇。
市場小姐：你又知習大放生馬雲？
佛系男：近幾個月，杭州政府已高調地多次與阿里巴巴搞合作項目，而且，近日黨報竟然一反三年常態，對馬雲由罵轉讚。風向已變，這很明顯的。
市場小姐：信唔信得過架？會唔會又轉風向？
佛系男：疫情防控都說放鬆就放鬆啦，這種180度大扭軚絕對有史可依。而且，而家習帝金口一開，雖然未有為搞垮經濟道歉，但大家都要畀下台階佢架麻，點都會做番點事，應酬應酬、意思意思。
你諗下，防控鬆綁都咁多人過關了。放生民企，自然會多咗人投資既。至於會有多少是長期投資、投放到實體經濟呢，就難以預料啦。但最起碼，要先把股市搞起啦。市值低、氣氛差，仲講乜信心？
市場小姐：照你咁講，難道中國要再次開放市場經濟了？真定假呀？
佛系男：你想知呀？不如你試下思考下先啦，留番下次講。
【關於 #佛系股評人梁樹德（Scott）】
MBA, MCG, MAP, IPA, CMA(Aust), ACG, HKACG, CESGA, IRC, AHKIoD
曾擔任本地金融機構的經濟分析員及證券分析員，從研究宏觀經濟跳入股票分析；後來成為上市公司投資者關係人員，熟悉上市公司的財務及資本操作、營運和公關策略。曾／現任信報、新城財經台、明報、大公報、DBC 數碼電台、Roadshow等媒體的專欄作家及演講嘉賓。執筆專欄包括《佛系股評》、《港股淘寶》、《膏腴梁肉》、《妙輝博客》、《尋珍記》、《股壇精英》等。
