網友來信：
“阿sir你好 ，我早排衰玩窩輪蝕左15萬 ，而家現金只剩$2萬，我月入26000。
想跟你方法，乖乖月供5000蚊0006，想問下有咩投資建議俾到我！感激不盡！
我今年25歲，仲有機會翻身嗎？”
龔成老師分析：
你好年輕，當然可以翻到身！只要你一步步進行理財，不止能追翻$15萬，長遠要累積過百萬都是很合理的。
我自己在18歲-23歲的5年，都試過幾次接近輸身家的經驗，雖然數目不算大，但都好痛，當時以為自己玩完，但而家睇翻，我好多謝當時有寶貴的經歷。
我當時都有玩過窩輪，炒過孖展，投機短炒，就係因為我輸過，先知道，這些方法風險真的好高，要賺錢真的好難！之後我就不斷學習，以長線投資為核心，財富先可以穩步增值。如果你分析全球真正賺錢的投資者、基金經理，佢地都無人短炒，都是長線投資的，巴菲特都是反對短炒的。
你這刻從基本步開始，一步步累積財富，你一定可以累積到比之前更多的錢，最重要是不要再投機，平穩增值就可以。
你月入$26000，不如試下加大儲蓄金額，逼自己每月儲$10000-$13000，只要你平穩投資，基本上5年都可累積到$100萬。
你用月供股票適合的，如果你每月能儲$10000-$13000，你可以月供$6000-$8000，餘下留現金等機會。
選股方面，電能（0006）是收息股，以你的年齡，未必太適合，因為你這刻是財富增長的時期，加上年輕可以承受較大風險，因此，你應該考慮平穩增長股+潛力股，作為累積財富的核心。你可以利用月供方法去長期儲貨，選有質素同時又有增長力的股票。
至於現有資金$2萬，暫時不要動用，因為你之前太心急賺錢，你要學識耐性。上述建議你將部分每月資金月供，你每月仍要儲一些現金，這些現金就是等機會，當大市出現恐慌期，股價處便宜區，就是難得的入貨位，你就可以動用之前儲落的現金，加大力度入貨。
最後，你要強化再強化自己的投資知識，睇多點書，出去上下堂，加油！
