網友來信：
“龔成老師你好，睇完你本《5年買樓4部曲》，開始同男友搵樓，希望日後結婚用嘅。我地主要睇港島區，因為有投資價值，加上男友的生活圈都係港島區，我自己都覺交通好方便。
目標係750萬或以下2房單位，我哋睇緊港島西同鰂魚涌嘅單位，以下係我嘅少少分析。
港島西（西營盤至堅尼地城）
✓ 因應明日大嶼計劃，日後升值潛力較高
✓ 有MTR，交通十分方便
✓ 社區生活配套齊全
✓ 傳統名校網之一
✕ 社區相對老化，小店為主，無大型商場
✕ 舊式單幢樓為主，多數樓齡40年以上，管理費/大廈維修費高
✕ 一落樓就係食肆、店鋪，低層單位較嘈雜
鰂魚涌
✓ 深受中產家庭歡迎嘅傳統住宅區
✓ 港島區中最多大型屋苑的地區，管理費/大廈維修費較低
✓ 社區生活配套齊全，有大型商場、百貨公司、超市
✓ 有MTR，交通方便
✓ 旺中帶靜，環境舒服
✕ 屋苑呎數普遍較大，入場費較高
✕ 區內較易上車嘅屋苑樓齡大，如南豐新村（樓齡4X年）
鰂魚涌係心水地區，但我對樓齡高有少少困擾，因為銀行以75年 – 樓齡（如44年）嚟做按揭，如果我地而家入場，銀行都仲可以30年期嘅按揭。
但當我地住咗十年八年後想換樓，下手買家做按揭可能少左，咁係咪會影響放售物業嘅機會呀？ 我地都係第一次置業，好多野都係上網自學。老師，可唔可以畀啲意見呀？”
